Man, 58, vas vir sluipmoordpoging op Donald Trump

Die voormalige Amerikaanse president Donald Trump is veilig en ongedeerd na wat die FBI as ŉ sluipmoordpoging beskryf. Agente van die Geheime Diens het losgebrand toe hulle ŉ gewapende persoon opmerk by die Trump International-gholfbaan wes van Palm Beach, waar die oudpresident se Mar-a-Lago-woning geleë is. Trump was op daardie tydstip besig om gholf te speel. Die verdagte, Die 58-jarige Ryan Routh, het in ŉ motor gevlug, maar is gearresteer nadat hy op die hoofweg voorgekeer is. ŉ AK-47, teleskoop, rugsakke en ŉ GoPro-kamera is in bosse langs die gholfbaan gevind.