Nuwe variant in Botswana ontdek

Gesondheidsowerhede in Botswana het ‘n nuwe variant van Covid-19 bevestig. Die voorlopige bevinding van hierdie nuwe variant in die buurland is aangewys as Omikron BA.4 en BA.5. Daar is vier gevalle, twee inwoners en twee besoekers met ‘n reisgeskiedenis, tussen die ouderdomme van 30 en 50 jaar. Die vier is ten volle ingeënt en ervaar slegs ligte simptome. Die ministerie, in samewerking met ander belanghebbendes, insluitend streeks- en internasionale liggame, bestudeer steeds die eienskappe en kenmerke van hierdie variante en ondersoeke oor of Covid-19-entstowwe doeltreffend is, is ook aan die gang. Die ministerie wag vir verdere leiding van die Wêreldgesondheidsorganisasie oor hoe om die oordrag daarvan te bestuur.