Koningin pronk op Vogue se voorblad

’n Jong koningin Elizabeth verskyn op die voorblad van die Britse weergawe van Vogue vir sy April-uitgawe, wat die modetydskrif beskryf as ’n huldeblyk aan haar Platinum Jubilee vanjaar. Die wit en swart foto is geneem deur fotograaf Antony Armstrong-Jones in die vroeë jare van Elizabeth se 70-jarige bewind. Armstrong-Jones, wat in 2017 oorlede is, was tussen 1960 en 1978 met Elizabeth se oorlede suster, prinses Margaret, getroud. Dit is die eerste keer dat die koningin op die tydskrif se voorblad verskyn. Die langste regerende monarg in die Britse geskiedenis, wat in April 96 word, het in Februarie haar Platinum Jubilee gevier. Die regering beplan vier dae van vieringe van 2 tot 5 Junie.