10 Dae het van die kalender af verdwyn

’n Video wat deur ’n Instagram-gebruiker, Real Truth, geplaas is, beweer dat Oktober in die jaar 1582, tien minder dae as gewoonlik gehad het. Die bladsy het internetgebruikers gevra om die buitengewoon kort Oktobermaand in hul rekenaar- of slimfoonkalenders te ondersoek deur terug te gaan na die jaar 1582. Die onderskrif van die video lui: “Vandag se datum is verkeerd.” Die video wys die kalender van 1582 waarin die datums 5 Oktober tot 14 Oktober ontbreek. Die kalender het direk van 4 Oktober na 15 Oktober gespring. Baie internetgebruikers het die logika daaragter bevraagteken. ‘n Gebruiker het gevra: “Wat het in die tweede week van Oktober in 1582 gebeur dat dit sommer uit die kalender geruk is? Nog ‘n gebruiker het geskryf: “Om die kalender meer akkuraat met die sonjaar in lyn te bring, is 10 dae in Oktober 1582 verwyder.” 

“Teen 1582 het die Julian kalender, met ‘n skrikkeldag elke vier jaar, tien ekstra dae in verhouding tot die Aarde se wentelbaan opgehoop. Pous Gregorius het dus sy nuwe en uiters akkurate kalender begin deur tien dae daardie jaar te kanselleer, waarin 4 Oktober gevolg was met 15 Oktober,” het die Amerikaanse astrofisikus en wetenskapkommunikeerder Neil deGrasse Tyson getwiet om twyfel oor hierdie raaisel uit die weg te ruim.