Geingob vergader by AU met Wêreldbank oor groenwaterstof-projekte

Namibiese President Hage Geingob is terug in Windhoek nadat hy die 36ste gewone sitting van die Afrika-unie-beraad van staats- en regeringshoofde in Addis Abeba, Ethiopië, bygewoon het. Hy het ook samesprekings oor Namibië se ontwikkeling van groenwaterstof-projekte met die adjunkpresident van die Wêreldbank vir oostelike en Suider-Afrika, Victoria Kwakwa, gehad. Stygende voedselkrisisse, veiligheidsbedreigings, klimaatsverandering en post-Covid ekonomiese herstel was van die onderwerpe wat die tweedaagse beraad oorheers het. Sleutel-aankondigings wat aan die einde van die beraad gemaak is, was dat Mali, Guinee, Burkina Faso en Soedan onder skorsing van die AU sal bly. Die vier lande was onder militêre heerskappy ná staatsgrepe tussen 2019 en 2022.