China skort dialoog met VSA op

China het vandag aangekondig dat hy dialoog met Amerika op ‘n aantal gebiede staak, insluitend tussen militêre bevelvoerders en oor klimaatgesprekke, weens woede oor Nancy Pelosi, speaker van die Amerikaanse huis van verteenwoordigers, se besoek aan Taiwan. China se ministerie van buitelandse sake het gesê hy skort ook samewerking met Washington op oor die voorkoming van oorgrens-misdaad en dwelmhandel, ‘n gebied saam met klimaatsverandering waar Amerikaanse amptenare geleentheid vir samewerking sien. Intussen het Taiwan se verdedigingsministerie gesê 68 Chinese militêre vliegtuie en 13 vlootskepe het sendings in die Straat van Taiwan uitgevoer.