Ash Barty en Danielle Collins pak mekaar in eindstryd

Tennis: Wêreld nommer een Ash Barty en die Amerikaner Danielle Collins sal Saterdag meeding om die Daphne Akhurst-gedenkbeker. Die plaaslike speler het Madison Keys van Amerika in die eerste halfeindstryd van die Australiese Ope sonder moeite verslaan met 6-1, 6-3, terwyl Collins afgereken het met Iga Swiatek van Pole. In die mansafdeling sal die 2009-kampioen, Rafael Nadal van Spanje, môre teen die Italianer Matteo Berrettini te staan kom, terwyl Daniil Medvedev van Rusland en Stefanos Tsitsipas van Griekeland sake sal uitspook vir die kans om Sondag die Norman Brookes-uitdaagtrofee te lig.