Amerika praat met Taliban

Amerikaanse amptenare en Afghanistan se regerende Taliban het hul eerste regstreekse samesprekings gehou, sedert Washington sy magte in Augustus uit die land onttrek het. Die BBC berig die samesprekings in Qatar het gefokus op die beheer van ekstremiste-groepe, die ontruiming van Amerikaanse burgerlikes en humanitêre hulpverlening. Amerika het beklemtoon die vergadering dui nie op erkenning van die Taliban nie. Dit volg ‘n dag nadat Afghanistan die ergste aanval beleef het sedert die Amerikaanse magte onttrek het. ‘n Selfmoord-bom by ‘n moskee Vrydag in Kunduz, het ten minste 50 mense gedood en meer as 100 beseer.