Yuk of mmmm lekker? Is ‘kakkerlakmelk’ die toekoms?March 17, 2025

Navorsing beweer nuwe ‘superkos’ propvol drie keer die voedingstowwe van koeimelk
Klink dit soos iets uit ‘n wetenskapfiksie-fliek? Wel, dalk, maar wetenskaplikes meen hierdie voedingstofryke stof kan een van die kragtigste natuurlike aanvullings wees wat nóg ontdek is. Navorsing toon dat kakkerlakmelk tot drie keer meer voedingstowwe bevat as tradisionele koeimelk.

Hoe word kakkerlakmelk onttrek? Navorsers van die Instituut vir Stamselbiologie en Regeneratiewe Geneeskunde in Indië het gevind dat ‘n spesifieke kakkerlakspesie, die Stille Oseaan-kewerkakkerlak (Diploptera punctata), een van die mees voedingstofdigte stowwe produseer. Anders as meeste kakkerlakke, lê hierdie spesie nie eiers nie, maar gee geboorte aan lewende kleintjies en produseer melk om hulle te voed.

Volgens die Journal of the International Union of Crystallography is hierdie melk propvol essensiële aminosure en gesonde vette, en het dit drie keer die energie-inhoud van gewone suiwelmelk. Wanneer die melk deur die kleintjies verteer word, kristalliseer dit in hulle mae en vorm dit voedingstofryke kristalle wat noodsaaklik is vir energie en sellulêre herstel.

Navorsers het ontdek dat kakkerlakmelk drie keer meer kalorieë bevat as buffelmelk, wat voorheen as een van die rykste melkbronne beskou is. Hierdie hoë voedingswaarde en stabiele proteïene het voedselwetenskaplikes se aandag getrek wat soek na volhoubare alternatiewe vir tradisionele suiwelprodukte.

Sal kakkerlakmelk koeimelk vervang? Die kort antwoord is nee. Alhoewel die voedingswaarde daarvan indrukwekkend is, is kommersiële produksie nog nie haalbaar nie. Die proses om melk van kakkerlakke te onttrek is arbeidsintensief en eties ingewikkeld, wat grootmaatproduksie feitlik onmoontlik maak.

Maar die idee word nie heeltemal verwerp nie. Wetenskaplikes glo dat met die vooruitgang in biotegnologie, soortgelyke proteïenryke produkte moontlik gesintetiseer kan word sonder dat daar met miljoene kakkerlakke geboer hoef te word.

Foto verskaf