Erongo-polisie vat dwelms vas

Die Erongo-streek se polisie het die afgelope naweek verskeie mense in verband met dwelms in hegtenis geneem. Die streekbevelvoerder vir gemeenskapsake, inspekteur Ileni Shapumba, het die suksesvolle naweek aan Kosmos 94.1 Nuus bevestig. Hy bedank die publiek vir hul wenke en doen ‘n beroep op almal om saam met die polisie te werk om dwelms vas te vat.


Gratis water verby vir Gobabis

Die Gobabis-munisipaliteit sal gratis water wat tydens die noodtoestand van die Covid-19-pandemie aan die gemeenskap verskaf is, afskaf. Volgens die burgemeester, Elvire Theron, is die besluit tydens ‘n raadsvergadering geneem, alhoewel gratis water reeds in September 2020 afgeskaf moes wees. Die munisipaliteit se skakelbeampte, Frederick Ueitele, het aan Kosmos 94.1 Nuus bevestig dat gratis water gister afgeskaf is.


Gevalle styg in Khomas-streek

Die Namibiese Gesondheidsministerie het vandag 408 nuwe Covid-19-gevalle in 13 streke uit 2 234 toetsuitslae aangekondig. Meer gevalle – 58% – is in die Khomas-streek alleen. In die groep is 21 leerders, ses onderwysers, 16 studente en agt gesondheidswerkers. Ses sterfgevalle is in verskillende distrikte aangemeld.   


Gigaba terug voor staatskapingskommissie

Die gewese Suid-Afrikaanse minister van binnelandse sake, Malusi Gigaba, het bewerings ontken dat hy in die posisie aangestel is om die omstrede Gupta-familie se naturalisasie goed te keur. Dié bewerings is deur Gigaba se vervreemde vrou, Norma Mngoma, gemaak. Gigaba is terug voor die staatskapingskommissie waar hy vrae beantwoord oor bewyse wat deur Mngoma voorgelê is. Hy sê sy oordryf haar belangrikheid deur te sê hy sou met haar beraadslaag wat sy werk as minister betref.


Nee vir homoseksualiteit

Betogers wat gekant is teen dieselfde geslag-huwelike en die afskaffing van die sodomiewet het by die Zoo Park in Windhoek ‘n gebedsbyeenkoms gehou. Lede van verskillende kerke het byeen gekom om standpunt hieroor in te neem. Pastoor Shirley Magazi van die koalisie van kerke het aan diegene wat homoseksualiteit beoefen, gesê hulle moet weet dat God hulle liefhet. Biskop Henry Ndozi-Okia van die Model Prayer Ministry gee sy mening aan Kosmos 94.1 Nuus.


Hof wag vir Bushiri’s uit Malawi

Die saak teen die omstrede egpaar, Shepherd Bushiri en sy vrou Mary, is in die hooggeregshof in Pretoria tot November uitgestel, hangende hulle terugkeer uit Malawi. Die twee het in November verlede jaar na hulle geboorteland gevlug nadat hulle in die Pretoria-landdroshof borgtog toegestaan is. Suid-Afrika het gevra dat hulle uitgelewer moet word en daardie proses gaan volgende week in Malawi voort. Die Bushiri’s en hulle medebeskuldigdes word aangekla van bedrog, geldwassery en die oortreding van die Wet op die Voorkoming van Georganiseerde Misdaad. Die bedrag ter sprake beloop sowat 15 miljoen Namibiese dollar. Die Bushiri’s het ook al in Namibië kom kerkbyeenkomste gehou.


Isis-aanvallers slaan toe in DRK

Nog minstens 39 mense is vandag in Ituri in die Demokratiese Republiek van Kongo dood ná Isis-aanvallers oornag op twee dorpe toegeslaan het, berig internasionale nuusagentskappe. Die aanvallers is glo lede van die Allied Democratic Forces wat sy ontstaan in Uganda gehad het.  


Vissermanne betoog

Lede van die Affirmative Repositioning Movement het vandag ‘n groep van meer as 400 vissermanne na die kantore van Cavema Fishing gelei om te eis vir die verwydering van hul vakbondverteenwoordiger, Mathew Lungameni. Lungameni is die voorsitter van die Namibië Verenigde Vissermanne-vereniging. Die betogers maak hul stemme dik …


Mej. Namibië virtueel gekroon

Die kroning van Mej. Namibië vind die naweek by die Windhoek Country Club en Casino plaas. Met die nuwe Covid-19-regulasies in plek waar sosiale byeenkomste na 50 mense verminder het, het Kosmos 94.1 Nuus aan die direkteur Conny Maritz gevra hoe die glansfunksie aangebied gaan word sonder om die regulasies te verbreek.